منتدي أبناء أبوجلفا
مرحباً بك فى منتداك

مسرحية طه وريا كاملة

استعرض الموضوع السابق استعرض الموضوع التالي اذهب الى الأسفل

مسرحية طه وريا كاملة

مُساهمة من طرف عبدالله يوسف صديق في الثلاثاء فبراير 05, 2013 9:34 am







الجزء الاول:
اريد ان اقدم لكم اليوم مسرحية طه وريا او المك نمر كما يحلو للبعض تسميتها وكما قرأت في كثير من المنتديات التى تناولتها لم تتواصل الي النهاية وبها كثير من الاخطاء الاملائية وحذف بعض الابيات ساقدمها ان شاء الله علي جزئين فالى وقائع المسرحية:

اغلب الروايات ان هذه الواقعة وقعت حوالي عام 1818 ميلادية وكانت الواقعة الشهيرة بقتل احد فرسان البطاحين (طه ودحسين ابكبس) حمد ود دكين زعيم الشكرية واحتمي البطاحين بابناء عمومتهم الجعلين وعلي راسهم المك نمر وكادت الحرب تقع بينهم ولاكنها انتهت الي الصلح
وصور الشاعر الكبير ابراهيم العبادي هذه الواقعه مع اضافات ادبيه جمه ومحسنات افضت بها الي مسرحية شعريه بقت اثر عظيم لتلك الواقعة التي تناسي التاريخ سببها الاصلي وبقيت ابيات الشعر والحان القوافي ......

قال طه :
أخوك يا ريا وكت الخيول بدبكن
أخوك يا ريا وكت الرماح يتشبكن
اخوك جبل الثبات وكت القواسي بحبكن
كم بكيت وكم قشيت دموع الببكن
قالت ريا
وراك اسود علي ما نمت اسع طيب
قل طه
بسم الله قولي اخوك طيب
نصيح وشديد حاضر قلبي ماهو مغيب
إلا الشفتو في النوم من هوايله يشيب
الزول في الصحي مخدوم عليه شقاهو
وإن غمض شويه تجي الهموم لاحقاهو
الصف ابلبوس انا ما بخافو لقاهو
ياليت الحلم في صحيا كان بلقاهو ...

كان خير والله شر منو مابهم بالى
وحارسنى الثبات من الكبار قبالى
وكت هسع حسيت وشفتك سالمة قاعدة قبالى
ان اتلخبط الكون تانى مانى مبالى

قالت ريا
كعب نوم النهار أمس العصير كنت نايمه
رأيت قدام فريقنا أشوف صقوراً حايمه
كبيرن غار علي من نومي تبيت قايمه
صحيت مهجومه لا مفصل ولا في القايمه

قليها طه :
وانتي كمان رأيتي صقور عباره غريبه
علامتا كافية ظنيت الحكايه قريبه
هاك مني الصحيح الما بتدخلو الريبه
هادي الحله بي عيني أشوف تخريبه
قام طه قاليها ارحكى لى ارض الجعليين نعيش هناك قامت ريا تبكى حاول يسكتا قال ليها
ما بفيد البكاء وكلامي احسن تنسي
قالت ليه ريا
كيف ما ابكي وكيف افوت مراتع انسي
افقد كل شي عزي ورجالي وانسي
تطلق فوقي نار عقبان تقول لي انسي ..
ماببكى الفريق ببكى الرجال قبالو
ان طعم الفريق مو بيوت شقاق وحبال
خرابو وانتو حيين مابمر بالبال
الا يقع كتالاً بعدو نلقى وبال
قال طه :
فال الخير أخير ما شفنا شيناً جدت
كلا لشفنا أحلام في طريقه إتعدت
قبل الليلة إيد لحمانا قطْ ما اتمدت
ما بنهد شرفنا لو السماء إنهدت

قالت ريا
خير إنشاء الله خير والخير مساك وصباحك
والفال السمح فالك يضوي مراحك
بالضيفان أشوف عامر تملي مراحك
شينك ما أشوف وأشوف هناك و أفراحك

قلل طه :
خير الزول يقول مهما الامر يتهول
قالوا الناس علي فالو الحلم يتأول
غاية الحي فناه إن كان قرب إن طول
يترك ذكرو والناس الوري بتتقول

قالت ريا : وريني الحلم التورك مزهول

قال طه :
أصبري لي أروق حبل الفكرمبهول
احكيلك شنو الشفتو والله مهول
شفت الوحده شفت النار وشفت الهول

أحكيلك تمام الشفتو ما بتغابه
جايين العصير أنا وإنتي من الغابه
سايقه ليك بهم قدامي بي رقابه
بينا والفريق إتولعت تقابه

قدر ما نشوف قدامنا نلقي حريق
وقت النار علت ما شفنا تاني فريق
باصرنا المروق ما لقينا لينا طريق
تشكي من عطش واخوك يابس ريق

فترتي قعدتي ,انا محتار جلست وراكى
حاقبه الدرقة ختيت سيفي فوق أوراكى
وكت بعد البهم لى قسعو قمتى براكى
غسعتي وجيتي ومعاك كور صقور تبراكى

تبيت بي عجل شافنى جفلن و طارن
غابن من عيوني وفي اللعوت اتضارن
ما غابن كتير جن يقدلن يتبارن
قدامن كبيرن عينني وغارن

سل السيف ولاقاهن أخوك يالضامره
تور عنز أم هشيم الفي المجامع دامره
سيل تلوى اندفق فوقو السحائب هامره
حجر الصاقعه فرتاك الصفوف العامره

بادرني الكبير ديك إستعدن وقفن
ما مهلتو طار راسو وجناحي يرفن
طارن ديك وقت بي ريشو رقد اتكفن

قالت له ريا : عارض ومات خلاص لي الليلة يمكن عفن ..
قال طه
نحمد ربنا الليلة مات عارِضنا
وان كان عمروا طال يا ريا كان قارضنا
يلحقوا بي عجل ديش همنا المارضنا
نبدا زواجنا بكرة منو البيجي يعارضنا

بطال البعيش في الدنيا اصلوا غناه
ان كان مالو راح غير اهله مين يدناه
سمح الفوق اساس ابواتو تمه بناه
والزول دون قبيله غناه شن معناه

ما بنفرح بي مال ونقول كفانا ورثنا
نفخر بالرجال في الحارة يبقوا ترسنا
نجمع ناسنا هيلنا من الكبار حارسنا
يحضروا اهلنا فرحانين يباركوا عرسنا

كل بطحاني يفرح بي عرسنا مناه
ساعة جمعتن بيتنا يتم بناه
عذاب عيش العزب يا ريا مر ضضقناه
سمح الزول صبي يلد ويربي جناه

طبعاً ريا ما قبلت الكلام ده لانو ابوها عبد الله المعروف بابو كبس ما تم سنه من وفاته والناس في حالة حداد فقالت
دا الاعوج تراه ووالشين نهايه حدو
إن شاع ده الخبر يملا الفريق لي حدوا
يقولوا ابكبس من دخل ود احدو
فرحوا وعرسو لا موجعن لا حدو

إن كان في الفريق ماتت مريه ذليله
لي الحول يرفعوا العرس الدخاتوا الليله
خليه ابكبس راجل الرجال ودليله
إن كان بي قبيلة تعدوا تبقي قليلة

خليه الكلام وعرسنا في ده الحال
من بالك أمرقو محال والف محال
علي ميتت ابوي اللي الليله حول ما حال
نصبح بكره ونسه ونشوف بشاتن حال

رد عليها طه وقال ليها
الموت ما شمت غاية البخود والببروا
والحد والحزن ما جابو زول من قبرو
الزول في الشدايد أولي يلزم صبروا
يترجي الكريم مولاه كسره يجبروا

بنخاتر منو الوجعه هيلنا برانا
نحن أهل المصاب والناس عزا مجابرانا
في أخر المراح دايماً تجي الفترانا
عادة الحد ندوسا والناس عقب تبرانا ...

بعدين ريا شافت تحسم موضوع العرس ده مع طه وانه لازم يتم السنة كالعادة المتعارف عليها في الحداد
فقالت
الناس بالمكارم والفعال بتباهو
زي الفطرة ينشا الزول حسب مرباهو
عاة جدو عادتو ونحل ابوه نباهو
يلبس ثوب قبيلته ان داره ولا اباهو

من الليلة حول مضيوه تاني اتكلم
الدايروا بيتم رب العباد ان سلم

رد عليها طه
تاني امضي حول وانا بالحسا اتالم
علي حكمك صعب انا قابله ما بظلم

نستني السنة قاسية وصعيبه علينا

ردت عليه ريا
تم الاتفاق من الكلام خلينا
زي عادة البلد لا زدنا لا قلينا
إن شاء الله السنة بي خيرة عايده علينا

يا طه البهم قرب رجوع سراحو
بنات واولاد ديك ناس فريقنا الراحو
نصيحة سمعتها من الكبار الراحو
قالو العربي ما بنعز كان ما مراحو

وتقوم ريا فايته علي الفريق وطه يعاين فيها وهي ماشه ويقول
ياريت السعادة ان كان وقت ايديه
كنت اعيش غني في الدنيا بالزنديه
علي حكموا ناسي الفى طلبوا الديه
اموت بالعطش والمويه بين ايديا
ريا عليا قاسية وجايرة فى التفنين
اه يا رب ارحم صبري امس ضنين
يمحف ديه السنه ربي الحليم وحنين
يخصمه من حياتي رضيت بعشرة سنين

كيف اهنا واعيش وانا صبر ولى مودع
وسببي الرخرخ المن قام صغير متفدع
جنيت وجنى جنا وحالى اصلو مبدع
اهج شقيش اهج فاضلي تانى اجدع

وهنا ريا داخله علي الفريق لاقوها خمسة عرب راكبين زواملم " وده بداية الحلم الشافتوا ريا وشافوا طه " العرب قربوا من ريا قام واحد من العربان المع ود دكين شيخ العرب نادي ريا وقال
بالضيفان تمري لا لام لا كلام
صدقوا اهل المثل توب العرب صح لام ...
قام واحد من العرب نادها
بالضيفان تمري لا سلام لا كلام
صدقوا اهل المثل توب العرب صح لام

ردة عليه ريا
حبابكم عشرة ومن دون كشرة والف سلام
يا وجوه العرب المتلي ما بتلام
انا بت الرجال اهل الدرق والسيف
بت الما بهموا بي حساب الخريف والصيف
بت البحجو لى المرقوب بكرموا الضيف
انا ريا كان شفتكم افوتك كيف

قام العربي قال ليها
من وين في الاهل كفاك فخر يا بنية

ردت عليه ريا
انا بت البيوت المن بعيد معنيه
بى فوق السما نفوسنا وبيوتنا حنيه
انا بت ابكبس في النسبه بطحانيه

قام رد عليها ود دكين طبعاً عرفها انها هي زولتوا العاوز يعرسا زاته فقال
عبد الله ابكبس عز البطانه وفخري
في راس العرب بنعد ماهو الوخري
كريم وهميم كان للقبائل دخري
بت شيخ العرب هيلك صحيح تفتخري

توقد ناره ديمه الما بكوس الجمره
وفي الضيفان يهوش سكينو دايماً حمره
بي كاس ما عبر لبنو بيجيك بالعمره
هيلو الشكرة هيلو الرئاسه هيلو الامره

المرحوم ابوك كان للقبيله غطاها
عزك قديم عمك حسين ابو طه
ان شاء الله اخوك دي السكه ما تخطاها
بقصد بيها ود عمها طه يعني هل هو في مكانه ابواتوا

فردت عليه ريا قايله
كما يسد مكانن قدموا ليش يوطاها ( يعني ماشي في الواطه ليشنو غير اكرام الضيف واغاثة الملهوف )
لا يفوت ولا يموت الساحتو يوت مغشيه
تقابة الفريق يوقد صباح وعشيه
زايد في الرجال طالق قفاي و وشيه
ضيوف الليل يكفيهم مرارة وشية

رد عليها و دكين
ما دخل التراب البركه في الذريه
والخلاك وراه ما بقولوا مات يا ريه
دايما في القبائل سيرة ابوك مطريه
بيكي وبي اخوك تزيد وديه المطريه

قام واحد من العرب داير يعرفا انه ده شيخ العرب ود دكين فقال :
ما بتسألي لامن وين ولا وين ترسو

قالتلوا ريا
كيف العربي يسأل ضيفو كيفن تنسوا
أول بكرموا ويخابروا ساعة أنسو
من مقلب حديث يعرف أبوه وجنسوا

فرد عليه العربي
عملتي حسابو ضيفك وكرموا وجبتيه
يخجل كان سألتي وإسمو ما عرفتيهو
إسم شيخ العرب سامعابو ما شفتيهو

ده خريف البطانه المالوا فيها مشارك
هيلوا السارحه هيلوا الصاهله هيلوا البارك
ما وقع لك كلامي ساكته لي شنو خبارك
فخرك ود دكين جاك في فريقك زارك

ردت عليه ريا
اهلا حبابو العزو ماهو لفايه
اب ناراً تولع للضيوف دفايه
بي شيخ العرب الإفتخار ما كفايه
التابعو إن جانا نفخربو ونخدموا حفايه

رد عليها ود دكين
بارك ربي فيك عقلك يدوم يا ريا
كرمك ماهو كلفه ديه طبعتك فطريه
إياك بت التلوب والسمته فيك محريه
قديم فوت البطاحين عزه للشكريه

في الوقت داك جاء طه ووجدتهم واقفين فقال :
مرحبتين حباب مرحب خريفنا الزارنا
حباب شيخ العرب اتشرفنبوا ديارنا
حباب راس العرب البيهو كل مدرنا
تنزلوا في الدرب مالنا ماتت نارنا

رد عليه شيخ العرب
حباب طه الضرس والفي الصهيباب راس
الجود والكرم هيلك قديم ميراس
نارك ما بتموت يا ولده الفراس
قاصدين ام شديد ومعانا عوجه راس

رد عليه طه
لعدوك العوج يا الفي الكبس سراي
راسك ما بدوس مليان رجاله وراي
باكر لي ام شديدة اركب معاك براي
يا شيخ العرب لاكن تختوا كراى
طبعاً شيخ العرب ما فهم كلمة كراى ديه فقال لي طه ...
طبعاً شيخ العرب ما فهم كلمة كراى ديه فقال لي طه ..............
هادي الشورة يا طه الغلبني دليله
كل البزمه القاهو فيك قليله

رد عليه طه شارح ليه كلمة كراي
كراي الدايروا تبقوا ضيوفنا انتو الليلة
ترقدوا في الفريق حتي ان عشانا بليله

رد عليه ود دكين
مسكنا الدرب أسرع قوام ما تلعب
دارك ديمه عامره والسمح ما بكعب
يكفين الوصف لاتشد جمل لا تتعب
وهدنا الطريق عقب الوصول ما بصعب

رد عليه طه
يمين تغشوا الفريق بتفوتوا نحنا مقابر

رد عليه شيخ العرب
عامر انشاء الله ديمه اياك مرسى العابر
مشطوطين خلاص مسكنا في دريب جابر
نخاف عوج الطريق منو لي المقدر خابر

رد عليه طه
دريب جابر مزم والسكه سالكه ورايقه
فرقان ما بتلاقيك ما بتعوقك عايقه
اخذ خاترنا نحنا قالوا واصله السايقه
بتراوح ام شديد باكر زواملك فايقه

رد عليه ود دكين
الزول ان وعد شين ميعادو يخلفو
في ربط اللسان يسخابو دمو يتلفو
سفري الليله فيه زولين ما بختلفو
ضروري اصل ام شديده علي وعد بي حلفو

ما بعرف ازوق من نشيت تبيت
فريقكم لي فريق وبيتكم يمين لي بيت
اجيك ديناً علي حتي إن بقيت حبيت
هاك وعداُ نجيض ارجانا بكره مبيت

شوفتي للفريق ايام بكي ابواتك
ما غابني حالك سمعت بي نخواتك
فريقك بكره ضيفوا وما بفوتوا وحاتك
إلا أحققك وبراي اشوف نفحاتك

يا ود الهميم النفسوا ما معارضاهو
كرم الضيف عليك مكانه ابوك فارضاهو
جاييك في امر ان تابه وان ترضاهو
غيرك ما بكوس واملي بس تقضاهو

رد عليه طه
غرضك مقضي كان احتاج لخيل وجمال
والضان والابل سارح يمين وشمال

ردعليه ود دكين
فوق القولتو انا لي فيك امال

رد عليه طه
بي دمي الغرض اقضاهو خلي المال

المهم طه زي فهم شيخ العرب وده ماشيلوا جاي وطه ماشيلوا علي المال

فرد عليه شيخ العرب
دي المأموله فيك وين الدرب خترنا

رد عليه طه
دربكم في السلم

قالوا شيخ العرب
والله تب ما ودرنا
بكره نجيك ان قلينا ولا كترنا

وهنا ودعهم شيخ العرب وسار بي جماعته قاصد ام شديدة وعلي اساس في اليوم التاني ينزل ضيف علي طه وقبيلة البطاحين

وفي اليوم التالي طلع طه مع ريا منتظرين ود دكين حسب موعده معاهم وفي الحديث قال لي ريا
في البال لي ضمير شيخ العرب متعوب
قايم نفسه يختف في الكلام مرعوب
الراجل كان زمان ضحوك ولعوب
ما خاتيلوا شئ ما شوفتي كيف مرعوب

حمد ود دكين مرتع دياروا وربعوا
ده الشئ السمعتوا من الاباه والتبعو
الراجل فاعيلوا يبين لك طبعوا
انا ود الخلا البعرف اسودهو وضبعو

ردت عليه ريا
اعوج كان يخلف الليله ميعاد جيتو
رجال وحريم كل اهل الفريق في رجيتو
قطعوا السارحه كل زول في مراحو سعيتو
كبار وصغار و حتي الراعي خله رعيتو

قال ليها طه
محال يخلف محال قال جايبو غرضاً عندي

ردت عليه ريا
كــان غـرضاُ صـعـب ؟؟؟؟؟
رد عليها طه
كان رأس نمر في شندي
وعدتوا أقضاهو وابذل كل جهدي العندي
كان بالمال وكان بالراى وكان بي زندي

قالت ريا :
هيلك من زمان انت البجيك تحجالوا
لاكين ود دكين عامر قديم برجالو

قال ليها طه :
يا ريا الكلام ده اخير تقفلي مجالو
وكت اوعدته بقضالو غرضو الجالو

وفي وقفه طه وريا يجوهم ثلاثه من ابناء البطاحين عبدالله وخلف الله واحمد
قال عبد الله
سلام يا طه

قال طه :
مرحب بي كبار قبيلتي وعزي
مرحب بالاسود البفقعوا المستهزي
ريا جات قبيلتك فوقه انكعى هزي
وإن زحينا يوم الحارة قرنك جزي

ردت عليه ريا :
اولاد بطحان تعيشوا ويزيد مراحكم ناير
وناركم في سرات الوادي تهدي الحاير
بتحلو المضيق وتصدوا غارات الغاير
ما هيلم تزحوا إن كان يزح الداير

قام خلف الله لما سمع الكلام ده خاف وارجف

فناداه عبدالله قال
خلف الله ولدي اقعد قبال ود عمك
كلام ريا هادا بشوفه غير دمك
من زمناً بعيد أتمني أسمع نمك
فرج همنا مولاي يفرج همك
دوبينا ......قول ... دوبينا

قال خلف الله
الولد البخاف من القبيلة تلومو
بخلف ساقوا فوق تيساً رقيق قدوموا
اما يجيب رضوه البهم البنقر فومو
وإما تخامشن قدح الرماد حرومو

سنابك حدر الطافه و جرايدك نوا
كورك سالو مزيقا و رطانه و عوا
الخلاني فوق نار أم لهيب أتلوي
النوم شفتو يا قرد القلوع شن سوا

أكل الشلخه لامن كمل المنسية
ود الحورى لبعسة عريب بت ريه
أكان ما أسكت الباكيات و أخلف الكيه
قوله أبو فاطنه يا الصادق خساره عليا

خرير دوماتو فوق عاجن رسن متلاقيه
يا الغول النقيب سويلو سوق الساقيه
بت معز الخلا الفوق الكجر متاقيه
عكرناها يا أمروبه النشوف الباقيه

وبعدين ظهر ود دكين في جماعته جايين علي الفريق
فقال طه :
هداك ود دكين بي زمله بان شفناهو
دار اليوم يروح خلف الوعد خفناهو
الراجل في الاصول ما خاتي لي معناهو
يا ريه استعدي الزول جمعنا عناهو ...

شيخ العرب قال:

ولاد بطحان سلام اهل النبا و الشكره
سلام عز العرب اهل الفحل والبكره
سلام يا طه يا راس الكرم والضكره
جيت لي غرضي يا طيب الاصل والذكره

رد عليه طه
مرحبتين حباب مرحب خريف الرازه
حباب شيخ العرب البيه القبائل عازه
حباب سيف العرب البيه هاشه وهازه
في يمنك قبيلتاً ما تقبل فازه

قام عبد الله قال : هيا جايهو الزمل

رد شيخ العرب
خليه يا عبد الله
غرضي إن كان ما أنقضى أنا زملي ما بتدله

رد عيه طه
الناس في رجاك من الصباح في مله
كدي شوف الطعام شيخ العرب بسم الله

رد شيخ العرب
ما باكل طعام كان ما حساب اتضرب
وقضيان الغرض فيكم حقيقه مجرب
الامر العنيتو كان ماحسابي اتضرب
ما بنفعني اكل وما بيرويني مهما اشرب


فقام عبدالله وقال
ياشيخ العرب امرك خلاص همانا
قول غرضك عديل خصصنا او عمانا
عسع نقضى ليك في محلنا اللمانا
كان بي مالنا كان بي دمانا

رد ود دكين " شيخ العرب "
عندكم الغرض لا بدور قلم لا ورقه
ماغرضاً تسافرو لو وتقيسوا الفرقه
يقضي ان قولتوا خير مابدورلو سيف لا درقه
وان قلتوا لا يروح شمار في مرقه

ما مقبوض وجيتكم لاجي فوقي جنيه
بي خيري ومراحي وتاني نفسي غنيه
جاييكم نسيب تدوني بطحانيه

رد عليه عبدالله
خير سميــها

رد ود دكين
في بت ابكبس لي نيه


قام عبد الله ر
قال عبد الله
يفتخروا البطاحين ساحتم راحبالك
لكن ريا امرها مقضي من قبالك
فات فيها الفوات لي طه هاد قبالك
من دون ريا قول الدايروا في بالك

ده فريق الصهيباب مافيهو واحده حقيره
مال ورجال وعز في الحله مافي فقيره
كثير الزي ريا مليان البلد من غيره
ان درت الضغار وان كان قصدت صغيره
قام شيخ العرب قال
إن مال الشجر ما بتكسرن فراعو
وقمحان الطلب لي المابجيبه ضراعو
ليه يا أهلنا للبيناتنا ما بتراعوا
القال راسي موجوعني يربطولوا كراعو

قالم عبد الله قال
حبل المهله يربط انت ارتاح بيت
بكره نمر سوي ونفلي البيوت بيت بيت
سمي الدايره ولوم البقولك ابيت

رد عليه شيخ العرب
يمين بالله غير الغايه مالي مبيت


هنا طه حز الكلام في نفسه لانه شيخ العرب بينوا ليه انه ريا مخطوبه وبعد ده هو بصر وبجادل فقام طه وقف وقال

يا شيخ العرب أمرك بشوفو حقاره
وما جايباك مره الجابتك بس غارة
وقرناك كثير ونفسك ابيت وقاره
خبرك هادا ما دايرلو دق نقاره

قام واحد من اعوان شيخ العرب اسمه علي ووجه الكلام لي طه وقال :
قبلك في اللجج يا طه راحو الهدو
تتجاسر علي شيخ العرب بتهدو
زولكم ماعقل يا كبار كما تهدو
بعنادوا الفريق خايف يسبب هدو

طه قاليهو
انا المالح الكارب خريفي وصيفي
المثلك تبيع مااظن اطول فوق قيفي
كان ما الليله في بيتي وبعدك ضيفي
في الشي السمعتو برد عليك بي سيفي
هنا قال شيخ العرب
كفي يا بطاحين فيكم اتغشينا
كرمكم جانا طامح رخصه اتعشينا
بعد الشى السمعنا كان ما مشينا
خايف في اجتماعنا تقع وقايعاً شينه

في وداعة الله عقب بيناتنا ما في علاقه
وات يا طه اتشفيت شبعت شلاقه
عمرت الشر سعيت دليته بي معلاقه
نحن وانتو بعد الليله يوم نتلاقه

قام عبد الله عاوز يرضي شيخ العرب ود دكين فقال
من ولدك زعل كل البلد بتكاورو
ارحكم بيتنا بيتو ونحن زولنا نداورو
نتدابر نشوف نحزم جمعنا نشاورو

رد عليه شيخ العرب
ضيف الغابه حالف ده الفريق ما أجاورو

قام عبدالله قال
سمح ارجانا يمكن طه نحنا نجبروا

رد عليه شيخ العرب
الزول في الرقاد شقو البريحو بخبرو
والزول البليد بي ايدو يحفر قبرو
عاد بنسوي عوسنا وطه يلزم صبروا

رد طه علي شيخ العرب و قال
سوي الدايره وكتر الكلام خليهو
والشر القصدتو معاي ابقي عليهو
طير اصل السما حتي القمر دليهو
يوم نتلاقه كل واحد بعرف الليهو

هنا خرج شيخ العرب ود دكين وعيونه يقدح منها الشرار وكبر الشر في نفوس الفريقين
وقام طه جاري في ظهر شيخ العرب ...... قام واحد من البطاحين اسمه احمد مسك طه وقال
أقيف يا طه عندي نصيحه ليك ابداها
العقده الصعيبه العاقل بيتعداها
الشكريه كثره نحنا مانا لداها
انا عندي العرب بريا أخير نفداها

رد عليه طه
ده راي السديد يا احمد تراك بي فكرك
روح لي ود دكين وريهو يسمع شكرك
يديك مال كثير وقبيلتو ترفع ذكرك
تصبح عمده فوق روسينا تخلف حكرك

قام رد علي طه عمه عبد الله فقال
ليه أحمد تهينوا نصيحتوا ما ضاراك
ما حق النقص وانت بتعرفوا براك
وكت بتسوي عوسك وما بتشوف بي وراك
نشاور ريا ممكن ريا ما دايراك

رد طه وقال
صدق القالوا خربانا البلد بكبارا
هديك ريا أسألوها واعرفوا خبارا
من غير السفر ما عندي تاني دبارا
نحنا وانتو بي دي الحاله ما بنتبارا

احمد:
يا طه المصائب للقبيله تقودا
مسافر وين مخلى النار وراك موقودا
طه:
انا السمتان جليس الردفولا عقوده
حد السيف بقطع عقدتو المعقوده

ما ولعت ناراً انتو تقعو فيها
شن دايرين براى وانا نارى مدفيها
أحلف ليك يمين دى الحله متقفيها
باكر من صباح قبال يحس الفيها

عبدالله:
نحن كبار اخيرلك ترضى بعرفتنا
مع الشكريه احسن نشترى الفتنا
ندى ود دكين ريه ونكتل الفتنا
ما من خوف ملاقات الرجال حرفتنا

طه:
من الفيها ما بزح ان تزحزح مره
وان حيين نعود ان طال زمنا اومره
عيش الدنيا ان كان يحلى وان كان مرة
الزين ما بدوم والزول بموت فد مره

عبدالله:
وقت صممت ما ترجع وتسمع قولنا
وسفرك دا المحال ما بقبلنو عقولنا
الموت ما بنخافو الخوف يمين مُوهولنا
بنعاين بعيد بنخاف بهادل عولنا

للشكرية بسيوفنا صغيرنا معتق
ما بنابا القتال ونقول جرحنا اتفتق
مرحبتين حباب الشر محل ما بتق
تنقد الرهيفه إنشاء الله ما تدلتق

طه:
الشكريه غوش واكتر علينا حساب
وضيف ليهم لميم ما بتربطو الأنساب
أنا لى غارتم حسبت الف حساب
لو تتعدوا رأى يمين عقابكم ساب

بجيكم حمد ومعاهو الرجال تابعاهو
قولولو طه طفش وريه معاهو
كيف نرضى السفيه الادبو ما برعاه
يرفض طلبك ات ونحن كيف نسعاهو

ابقوا قصادى وحدى القبيله محايدا
عقبال من رجع فوقو الخسائر عايدا
وان كان دارنى انا ما بترجع جموع الزايدا
وان حصلنى قط ما اظن يعود بفايده
عبد الله:
ما بقيف ودكين واصل السرج ملعوق
وفى دربك بسوق واياك يا طه ملحوق
وات صنديد تصد الميه ما ممحوق
بنخاف كترتم وايد الرجال بتحوق

طه:
ليه خايفين علىّ الدنيا عيشا مخاطر
الواجب نسوى ونرجى ستر الساتر
فى وداعة الكريم الليله فى نيتى خاطر
يا دار ريّه ما كان الفراق بالخاطر

كفايه مع السلامه انتهينا خلاص
غير الشوره دى مالينا تانى خلاص
فى نيتى حرير الدكب القصاص
ما بخاف ودكين ان جانى بالرصاص
(قام مارق منهم وساق بت عمه ماشى بيها طبعاً لارض الجعلين..ماشى للملك نمر يوريه على ان نسيبك دا جاى يقلع منى بت عمى -قام مارق- بعدين احمد قال لعبد الله)
أحمد:
عم عبد الله خبرك هذا شيتن فاجع
كيف بنطاوعه من بيناتنا يطفش ناجع
عبد الله:
سمعت كلامو من الفيها ما متراجع
وفى الشىء الشايفو غط بهينه ما بيعود راجع
أحمد:
نركب نلحقو نخليهو يمشى براهو
عبد الله:
شورة القال اخير ما نلحقو ونبراهو
العاقل بحسب للتقيل تافراهو
بنفكر على القدامو والبواراهو
أحمد:
فوق السقوط قط فى ظنى ما يخلوهو
كيف موقفنا ساعة يلحقو يكتلوهو
عبدالله:
ان وقع القدر ما بتقدرو تصدوه
ودا كتر الكلام اسع اخير تخلوه
( بعدين ساق بت عمه وفى الخلا كان بحجى فيها وقاليها)
طه: درقى يكركب كيمُو
رُكبى يشيل بر عمهو
أصلى بطرز امه
منى تحود الأمه
جمل يكسر الهربه
سيفى يحل من كربه
قلبى ثميناً تربه
ما بتقمانى الغربه

يا ريّه الحلم ما شفتى كيف اتهول
واتفسر براهو وبالشين علينا اتأول
داخل راسى فكراً منو ما بتحول
بكتلو ود دكين ان كان قرب كان طول
ريه:
اسود ود دكين باسمو ما تحجيبنا
هو الفرقنا قمنا من البلد هجينا
عقب فى دار جعل تانى الخرابا بجينا
ما بسوى الرماد المك نمر بحجينا
ماك شايف الدرب
طه: ما شيهو بكرعىّ
تلات ايام وضحوه وكان معايا سعيه
كيف يلحقنا زول شندى ومعاه معيه

قبيلة دار جعل محميه فيها اسودا
تقدل بالكارم ديمه وحاقدا حسودا
رأس المك نمر كل القبيله اسودا
ركازة القبائل فى السنين السودا

بكره نجيهو ابوسيفاً يجيك بولادو
العز والكرم من الكبار تيلادو
ما أظن ود دكين بشينه يوطا بلادو
ما خد بت اخوه شمه ام اولادو

ان ودعتك المك ما بخاف المتلو
اهون من شراب المويه عندى اكتلو
وارجع للبطاحين تانى راينا نفتلو
والشكريه تقيو غير حرب ما بتلو

يا ريّه البطاحين أصبحت محقوره
على الشكريه دايما سارحتم مدفوره
ما بتقال عز وتعيد مكان وقوره
إلا الغاره وتقضى صقورة

ريّه: فى داب الشديدة ابقالنا قوم دربنا
بوصفك دحين من شندى نحن قربنا
ما بنفتق عشنا بالفتقه دى نفرقنا
ما بنوم الرجال امكن يمسكوا دربنا
طه: يسمع حركه
ريّه: شد ديل يبقى رعاويه
طه:
حركه صُهب دا ركوب سروج مو رعويه
وقربت مننا وفى ظنى ناسها شويه
وكان ناس فزع ما بجيبوا حتى ضويه
ريّه:
يا هم ناسنا خمسه عقاب رجال'' وينو
ما بتشوف ودكين برز براهو هوينو
طه: الشىء البينا نحن سعينا لتهويلو
وضايقنا الصعج ما أظنو يعود لعويلو

الناس المعاهو عرب صعيد يا ريّه
ما اولاد عم ديل والله ما شكريه
معروفين تمام فى كل بلد وجريه
كان حفرولو بير ولقوه شجره ضريه

الجايين لها بحكيها ليك جمال
قايمين من هناك ورانا بي امال
عارفين ود دكين ما بهم بخيل وجمال
بكتلنى وبسوقك وهم بسوقوا المال

وبكتلو ود دكين ودى الطانها فى فكرى
بتشوفى الفضائح المابجيك من شكرى
الشكريه فرسان ومستحقين شكرى
دا الصح قلتو ليك انا لا بخاف لا مكرى
ريّه:
يا طه استعد الناس عنونا عديل
طه: وين شفتى القطابي بتسوى هم قُديل
بضاير العوق اخوك الما بهم من ديل
براك بتشوفى ياما اشبعهم بهديل
(هنا شيخ العرب جا وقف جمبهم قال لطه
شيخ العرب:
أتعبت الزمل حفيتا وراك مستبقا
احسن ليك تفوت ريّه وتحل الربقا
طه: كان كل القبائل جات علىّ منطبقا
أفوت من ريّه يا شيخ العرب ما بتبقا
شيخ العرب:
البلاقى القبائل ما بسوى سواتك
خربت قدلتك يا طه وين دعواتك
تانى بعد جريك البشهدنبو اخواتك
فرقت الثبات فارقت درب ابواتك

ابواتك تيوباً كانوا باعن طايل
ايدن للرقاب تحجا وتعدل المايل
سيف باعك كراعك ما بتخاف قول قايل
أفو يا ود حسين فيك الشراد مو خايل

أبقى لى نسيب أحجاك وآمل روعك
وقول الدايرو فى المال اجيك فى طوعك
من هذا الغرور يا ولدى اولى رجوعك
طه: يا شيخ العرب جربت لحسة كوعك

كل ما اوغرك فى الشينه اراك تتقدم
اتماديت خلاص ان صبرى حصنو اتهدم
اصلو البينا ما بتنفك من غير دم
الكاينه التكون بوراها مافى ندم
( واحد جاى مع شيخ العرب -عربى- قال لطه)
العربى:
أصلو الخملا ما بسمع نصيحة الهادى
اول خفنا ليك من البهادل هادى
يا طه البهدّد ما بضرب الوادى
يمشو على الرجال ويجرى ومقبل قادى
طه:
هسه وصلت الميس دحين حديد يلاقى حديد
ينبرش الطرور ويثبت الصنديد
خليه المضا لاقى البجيك جديد
(واحد برضو مع شيخ العرب قال لطه)
عربى آخر:
نافذ فيك قدر يا طه انتا عميتا
وفى الهرب وقعت عترت ما سميتا
من الجاى قضيت وبقيت خلاص زول ميتا
فى تركتك كفاى انا بركب اب سوميتا
(اب سوميت دا جمل طه)
طه:
الداير الغنى يعمل حساب لفقرو
وكعب الضله كيف المتلى انت تحقرو
اب سوميتا خلى الليله سيدكم اعقرو
وين تانى الملاج وكتين يتلب صبرو
شيخ العرب:
لم باقى الكلام ياطه بهمك سرّب
جيتك استعد
طه: مرحب حبابك قرب
من قومت الجهل انا للقاك مدرب
يا شيخ العرب الليله نجمك غرب
(وهنا وقع القتال طه ضرب شيخ العرب جدعو والتفت على جماعتو قال ليهم)
طه:
ترا شيخ العرب قبض الربح من تجرو
واتوسد تقيله ان شاء الله ثابت اجرو
انتو الشورة كيف عند الزمل بتحجرو
صنقعوا دا السماء بطيرو والله بتجرو
أحمد:
انزل يا عمر الروح فى يد الخالق
بجايه الضرب فى الدرقه ساسك غالق
عمر: عاين دا الخشيم دايما تنط متشالق
ما تنزل عليه ات ماك بالق
طه:
ضربى صعب على وصف البوصف عارز
وفى قارب التلوب انا نايبي دايما غارز
اسمعو يا طمش كان ما بجينى مبارز
واحد منكم بضرب طرف ما فارز

ترا اب سوميتا اركب يا عمر سافرت
قبيل وقت الكلام متل الأسد طفرت
مالو دمك بهت متل التقول جفرت
عمر: من القلب انا ليك تبت واستغفرت
طه: انا على حلف ان كان بقيتو سريه
منكم انتهى قبال تجى العصريه
جيتكم استعدو تانى مافيش ريه
( وكلهم قالوا ليها)
هادى السيوف واقعين وراك يا ريه
طه:
يا خضرة المفرهدا فوق جروفا نديه
على الواقع وراك انا كيف اشيل ايديه
حتى ان كان كتلنى عافى ليهو الديه
دمى ومالى هيلك واقبليهو هديه
ريّه:
رجال التابه انتو الستره تب ما فالكم
اتأمنتو قوموا وامشو سوقوا جمالكم
حتى مال ود دكين سوقوهو يتبع مالكم
نمشى فى حالنا وانتو امشو فى حالكم
(الجماعه قاموا صوف اتلفتت على ود دكين قال لريه
طه:
زايله رقد دكين اسد القبيله الراعى
كان ما ضايقنى هو ما كنت قطتو ضراعى
ريّه:
تتأسفلو ليه كان داير يجز براعى
والنعلات حرام ما تضوقا تانى كراعى
( يعنى ان مات ود عمها دا للقيامه ما تلبس نعال)
طه:
موت المتلو نقصان للعرب فى الجمله
كان رأس الجرارق وهو البقود الحمله
اطرف فعايلو جفنى يجف بعد ما يمله
كان ما شويه كان داير بعمل العمله
( بعدين قاموا طوالى مشو فى دربهم.. برضو يعنى فى مسيرن
ماشيت للمك نمر..طبعاً قبيل كانوا ماشين وحصل ما حصل..هم برضو حيكلموا الملك نمر..ساق بت عمو ولقوا المك نمر قاعد وجماعتوالجعليين واولادو قاعدين وهنا جاهم قال ليهم)
طه:
التلب اللذوم مدخور يشيل العائله
اقدل بي مهل فوقو الحمول الهائله
اياك مرق القبائل فيك تسند المايله
فراج كربة الهم اب قبائلاً جايله

عامر جمعكم انشاء الله ما انفضه
ما جابنى مال ما بدور دهب ولا فضه
بدور المك نمر سيد النحاس الجضه
جيتو علىّ حملةً غيرو ما تنفضه
المك: تقضى كان بقدره

طه: انت اللزوم ماك حاشى
الاف ذى حزمتى تشيلها تقدل ماشى
التقيان تفشه والضيف بتراشى
ما داب قبيلتك نحنا بيكا نفاشى

جيتك يا مك واملى فيك تكشف همى
فى الأول وداعتك وفى حماك بت عمى
وقتين تقبلا ات شلت تلتين همى
والتلت الأخير تحجانى تحقن دمى

بت عمى اب كبس ما كان ابوها فقير
ابوى قبالو مات وربانى كنت صغير
وقت لحق عيش وراه مانى حقير
اصد الغارعلى جارى ولعروضى اغير
المك: مالك اسح شن جاك
طه: جاتنى جنيه حربة ربى ما بخاطرى ما بنيه
المك: قتلت منو وجريت
( التفت على بت عمو قال ليها)
طه: ها ما بتسمعى يا بنيه
هدى المابيها لكن خفت ورانيه

الموت ما بخاف الخوف مو هولى
الشىء البخافو بخاف بهادل عولى
الناس الوراى كان براى يسعولى
فى راس الكتلتو اقيف يمين للحُولى

كان هم برضو بتارت ياخدو الهيلتى
ما كنت التجيت ضاقت علىّ مهيلتى
يا مك ناسى قله بخاف يخربو قبيلتى
بجعلى احتميت فوقك سندت تقيلتى

الشكريه تقيو وللجوار ما براعو
حمد وودكين فى راسى ختا كراعو
سمع بى سفرى قاصد شندى قام بسراعو
وقاطع دربى يخرط ريه قال بضراعو

جيت من اهلى قاصدك ما بقبل تار
انكشف الامر براك دحين اختار
آما تبقى بينى والبخافو ستار
ام تكتلنى ات نسيبو تاخد التار

اياك عز القبائل والكرم فيك طبعا
وجارك ما بهم ان يسوى السبعا
ان كان اجلو تمّ اخد قصاصو السبعا
واليكالو الاسد اخيرلو من الضبعا
(آآآ..المك نمر هنا التفت على الجعلين القاعدين جمبو قاليهم)
المك: مطارق جعل اتو الكلام سامعنو
قولو دحين رايكم وفكركم الشارعنو
(واحد جعلى تلب وقف على حيلو قال ليه)
جعلى : كان ضيفنا ما نحميه وندافع عنو
نرمى سيوفن ليه تانى الحصان ساعينو

قديم يا مك ديارنا مرتع الامال
وشعبه الكون ، ركازة الزمان ان مال
سعين من جارى العوق يمين وشمال
بدمانا التنزيل نحجاه قبل المال

اديه الامان يقدل ويلقى مناهو
البقى فى آمان المك منو البدناهو
كل اسم جعل من اعلاهو لى ادناهو
محال يبعد والمك نمر ادناهو
المك:
انت كبارنا شورتكم جمعنا بتعمرو
مارستو الدهر ضايقين حناضلو وتمرو
غايت الحى فناه الموت نهايه امرو
لكن بوراهو ذكرو يصبح عمرو

اياها الضامره وعليها كنت مصمم
ما اتعداها رايكم جاى ليها متمم
صار فى امانى طه الزمام متزمزم
ادوه هدومى وبعمامتى اليكون متعمم

ارتع فى امانى انا البفش البطقو
الزمنى اليمين ان ولدى جاك ما اعتقو
بالمال الشرت عازم اباصر رتقو
وان كان قالو لا عقبان نوسع فتقو

نبه بالأمان فوق النحاس بشربو
لامن يسمعو الناس البعاد والقربو
عقب البدنو طه يمين عقابو نخربو
انا المك نمر كبريت يحرق الجربو
(طه طبعاً اتكيف من كلام المك نمر خلاص قال)
طه:
نمراً يركب الكيك البطل اتحرن
نمراً يقلب العوقه اب صفوفن جرن
خلوات صدرة فى علوم الحروب كم قرن
سيفو بنسرف الدرع الحديد مقرن

مو متل الشجر حاضن فروعو مقيل
دا النمر البضاير الصف محل ما يميل
كل ما اقول شكر القاهو فيه قليل
كفو بيخجل العين اب سحابه ميل

غابة المك قبيلة ما تخطى اصولا
العشمان يعيش فوق ضلها ومحصولا
بالشينه البدوره بعيد عليه وصولا
فروعه سيوفها ومطارق جعل فى اصولا

عرمان جدكم النسبه عباسيه
وايان فضلكم لليله ما منسيه
هاهى الدنيا حيه بفخركم مكسيه
نزيلكم ما بهم ان سوا الاف سيئه

من سابق العرب فى اصلها وفخوده
مثبوت الرجاله وعنكم ماخوزه
صغيركم يدخل الحارة ام لبوس ويخوده
مجرب من قديم سيفكم بوابر الخوده
المك:
وصلو طه للبيت المخصص ليهو
واحفظ كل موجودو وجميع ماليهو
خدمتك باحسن تقعد معاهو تسليهو
فى كل يوم تعيت ناس يغفرو عليهو
طه:
عشمكم مؤكد مابيرجع خائب
وصغيركم رايو عند الغير يوازن الشايب
شايبكم مجرب رايو دائماً صائب
فارسكم جسوراً مابدكدك هائب

تمانية ايام قهر عينيا جافية منامن
ساكن قلبى ديش الهم محاصر وكامن
دخل عريان وخايف مرقت لابس وامن
ماتنوم عين عدوك الليلة انوم مطامن






واحد حاجب كان قاعد جنب المك نمر قال
الحاجب:
نبه بالامان فرسانا فازن وهزت
دقينا النحاس فوق الرجال انعزت
عروس الكُجرة فرحانه وطرب اهتزت
عرمان عزُّ لله قبيلتو بيك اعتزت
المك :
مالك يا النصيح متل التقول فى محنه
قول انعشنا بالصوت الجهور افرحنا
ابدى بنصايحك وبيها أخير انصحنا
واختم بالحماس بالفينا قول لىّ نحن
النصيح:
خلى عجب النفس الدنيا قيد قصير
وبشرك اطرحوا لا تكون دوام متغير
لا يغيرك هواء ضل الضُحى المتغير
كم سبق الاجل خلا الامل متحير


النصيح :
الروح على اى حال ياتيها نصيبه
والصاديها من خالق البريه تصيبه
ارضى فيما بيدك قدرها وتنصيبه
إن لم ترضى قد زدت المصيبه مصيبه

الليك ان قاطعك ان كنت فاضل واصل
واعفيه ان اساءلك واجعل برك واصل
كلما ازداد سفهو ازداد فى حلمك واصل
بذلك تكفى شرو بغير درق ونواصل

ما تعاند القدر وانت ليه متألم
صدرك بيتًو فاضى ولله امرك سلم
إن عاقك معيق او افصحك متكلم
ارجى جزاك يوماَ ينصر المتظلم


المك :
قول نحن من بيت مُلك وديانا
تواريخ السلف قاديانا
نحن نفوسنا ما معاديانا
ترتع ديمه فى وديانا


النصيح :
نحن الما إنجمع لي فارغه كور لمتنا
تعلو لى مقاليد السما قمتنا
نحن الفى العرب ما بتنغفر زمتنا
تيجان الملوك تعمل حساب عمتنا

نحن الدنيا هيلنا زملنا ديمه كسيحه
الغفر المخاوف لينا بطنو مسيحه
للعشمان تجد دارتنا ديمه فسيحه
ترمى الفى زحل وتخت بدالو كسيحه

تراها الدنيا حيه ادونا عنا امانا
من عهد الصغر لى عند وكت هرمانا
بى مر الدهور ثم العصور وازمانا
لو كان بالوهم فد يوم سهاما رمانا

و هم في مجلسهم داك دخل عليهم واحد جعلي مسرعاً فقاطع حديثهم قائلا :

الشكرية زاحفة الليلة جات بى عقابا
ختت فى النصاب لى كتالنا مادة رقابا
لقيت يا مك جمال سارحة خربو الغابة
و اندك الزرع لا قصبة لا رقابة

المك نمر :
مطير درقة وين فارقت عقلك شرق


الجعلى :
انا ود الحروب البى سيوفا مجرق
ادينى الاذن يا مك وسيفى مطرق
اعصر كيكى فوق كوش العريب يتفرق


المك نمر :
الخيران كتار ما اظنهم تسابا
وبى كتال قوم جعل ما بفرحو الكسابا
ما بجو ناس كتال الناس معانا نسابا
و البيناتنا لابد يحسبولها حسابا

يدخل عليهم وفد الشكرية :

سلام دار جعل يا مك نحن رزينا
بى موت ود دكين كل القبيلة حزينا
محمد بقول بى نسبك اتعزينا
رسل لينا طه قبال تجى تعزينا
(محمد ود دكين اخو حمد ووالد شمة زوجة المك)
المك :
قبيل يوم حمد دار طه جاهو براهو
ما دق الطبول و قبيلته جات تبراهو
السواها طه اكبر على محراهو
راجل خاف جري تجري القبيلة وراهو

ضعيف كاتل حمد فى القوة ماهو كفاهو
بس خانو القدر ساكت اجل وافاهو
الراي السديد شيخ العرب يعفاهو
و الزي ود دكين دم طه ما وافاهو

مالك يا شيخ العرب لى راسك حانى ؟

شيخ العرب :
الفى صدري شيتا حايصة ما رايحانى
راضى الحال على كاتل نسيبك حانى
الظانينو كان تقتل اسم بطحانى

المك نمر :
الظالم لى من ما حمل عزاهو
و حقك تاخدو تام وقتين تقيف فى جزاهو
البعفى المسئ عند الله بلقى جزاهو


جماعة من الشكرية :

محال محال نرجع من غير طه ولا نكتلو
نرجع لى قبيلته كتالنا ماليهو بثبتو

المك نمر موجها حديثه لوفد الشكرية:

قول ليهم طه نزيلنا و المك جارو
اصبح فى امان الما بهمل جارو
شن جاكم جديد كنتو الفضل تجارو
ما تعفوه طه فى دربه ليه تتجارو

زعيم الوفد:
فى زولنا الكتل هانت المسافة و قربت
الكاتل كان بخلوه طه ما كان كربت
غير نطلب اذن زاملتنا كانت شربت
كان دي الحالة بدري الدنيا كانت خربت

يدخل طه ويقف بينهم قائلا :

يا مك فداك ودينى
ما تتكتلو سلمنى النسد فوق دينى
بسببى الخراب لى وطنى ما برضينى
احقن دم العرب بى دمى غرة عينى

المك نمر :
ما تحسب حساب وقتين بقيت فى امانى
و تسليمك محال فى الدنيا حى عرمانى
الجن و الانس كان تجى مداهمانى
دونك دمى يتدفق و دم قيمانى

المك نمر موجهاً حديثه للشكرية :

يا ناس بيناتنا النسب كان جيتو بالودية
فى دم القتيل راضيين نخت الدية
و ان قلتو لا و درتو الكلام ايدية
ندق التور ضحى و نجرب الزندية


احد اعضاء وفد الشكرية :

دا الشين البخلى الزول يعضى ايديهو
المك كان ختى منو البقوم يهديهو
كاتل ود دكين لا تكتلو لا تديهو
الشر اقصرو الزول اخير عديهو


المك نمر :
بعد الهد عقب بيناتنا حد السيف
و كان ختيتو دية انا منكم ما بقيف
راعيكم جديد ما برعى فى العليف
عتبات الصراط اهون لو من القيف

جيتو تهددونا الرسلوكم شربو
بكرة الجيش بجيكم اثبتو احملو حربو
شاردكم ما بخلى و بلحق عقابكم اخربو
و النازلة البحر عدوها بس معقورة

رئيس الوفد :
الشكرية ظاهرة قبيلة ما محقورة
كان درتوها ياما تلاقو فيها صقورا
قبال يثبت الفارس يختفو القورة

المك نمر :
بقيتو رجال تغيرو تصلو لى عند وكري
يا قراضة القبايل النص جمعكم مكري
قول للرسلوكم ما يجينى عقبان شكري
البيناتنا خربت ارجو عاد عود فكري


احد اعضاء وفد الشكرية :

قبيل حامدين فعايلك و بانشراح جايينك
ليه بتهينا يا مك كتيرة دي منك
وقت ابعدتنا و بقى طه ليك و منك
ان زليتنا و ان جليتنا ما ناطينك
ما فينا الاضينة و مانا قلة كُتاار
بنصل الحارة نحن نوجب البتار
صغيرنا ان جاك يعجبك للصفوف بحتار
كبيرنا يفرتق الحافلة و يجيب التار

جرق ما جفل خايف صياح الساقية
و الحارسة السرج لابد تكورك راغية
سمعناها عاد و الفارقة ماهى ملاقية
عرفناها المعاك نرجع و تبقى الباقية

المك نمر :
هوي يا عرب احسن تراعو ادابكم
واسوه الكلام قبال اواسى رقابكم
ما عندي الاضينة الاصلو معدود دابكم
فد جعلى ان ركب حالا بخربو عقابكم

فلاحة العربى داب سفروقه و يجلب كلبو
يا يربط درب و يرجى الاضينة يسلبو
الهيلكم حقيقة و فيها ما بتنغلبو
فالحين فى القنيص ترعو و تعرفو تحلبو

رجالة و كرم ديل بيهن اختصينا
وكت الكوع يحر نحجا العروض و نصينا
هد شامخ الجبال كان درناه ما بعاصينا
سيوفكم فى الحرب بنكسرن بى عصينا

كفاكم استريحو من الكلام دة قضينا
الدرتوها انتو نحن بيها رضينا
قبل تتمد سداكم تلقو نحن حبينا
و الحكم الحسام و السيف يكون قاضينا
سنواصل ان شاءالله لوفى العمر بقية










مواضيع مماثلة
avatar
عبدالله يوسف صديق

عدد المساهمات : 240
تاريخ التسجيل : 14/10/2011
العمر : 48
الموقع : السعودية- جامعة الحدود الشمالية

الرجوع الى أعلى الصفحة اذهب الى الأسفل

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى